Ka përfunduar protesta e tetë e opozitës, ndërsa mbështetësit e Partisë Demokratike janë rikthyer më pas në selinë blu. Pas përfundimit të tubimit, kreu i PD-së, Sali Berisha, dha disa deklarata për mediat dhe mbështetësit.

I pyetur nga gazetarët se kur do të mbahet protesta e radhës, përpara apo pas 23 majit, datë kur zhvillohen zgjedhjet për kryetarin e PD-së, Berisha u përgjigj: “S’kam asnjë koment. Nuk e di ende, do ta shohim.”

Më tej, Sali Berisha deklaroi se protestat janë pjesë e një beteje kundër qeverisë së Edi Rama.

“Nuk ka polici në botë që mund një popull kryengritës, ta harrojnë. Jemi në këtë betejë me moton e hershme të shqiptarëve: ja të vdesim, ja të rrojmë për liri”, u shpreh ai.

Berisha akuzoi qeverinë për korrupsion dhe varfërim të qytetarëve, ndërsa përdori tone të ashpra ndaj kryeministrit dhe zyrtarëve të mazhorancës.

“Asgjë nuk do të mund të na mposhtë pa nisur në burg Lubi Ballukun, atje ku e ka vendin kjo hajdute e pafytyrë. Pa larguar nga pushteti dhe pa dërguar para ligjit kriminelin Edi Rama”, deklaroi kreu demokrat.

Në fund të fjalës së tij, ai paralajmëroi vijimin e protestave dhe theksoi se opozita do të vazhdojë strategjinë e saj paqësore.

“Rama, dije mirë se të ardhme nuk ke. Fundi yt është i pashmangshëm. Strategjia jonë është e të pamposhturve”, tha Sali Berisha.