Deputeti i Partisë Demokratike, Blendi Himçi, ka reaguar ashpër ndaj vendimit të Këshillit Bashkiak të Elbasanit për rritjen e tarifave të shërbimeve për vitin 2026. Sipas tij, vendimi është marrë “në mënyrë krejtësisht arbitrare dhe pa asnjë analizë ekonomike”, duke prekur të paktën 8 shërbime bazë për qytetarët.

Himçi kritikoi rritjet e tarifave për pastrim, ndriçim publik dhe mirëmbajtje infrastrukture, duke theksuar se qyteti dhe lagjet rurale vuajnë nga shërbime minimale ose të papërfunduara.

“Si mund të rritet tarifa e pastrimit, kur koshat e mbeturinave janë çdo ditë plot? Si mund të rritet tarifa e ndriçimit, kur lagje të tëra jetojnë në terr?”, pyeti Himçi.

Ai akuzoi Bashkinë dhe kryetarin Gledian Llatja për mungesë transparence dhe përmoskonsultim me qytetarët, duke theksuar se vendimi vjen në një kohë kur qyteti po përballet me probleme të mëdha ekonomike: falimentime biznesesh, pensionistë që nuk mbyllin muajin dhe largim të të rinjve.

Deputeti i PD theksoi se rritjet e tarifave pasojnë premtime elektorale të papërmbushura:

“Sa herë ka zgjedhje, Partia Socialiste premton ulje taksash, rritje rrogash dhe mbështetje për biznesin. Por vetëm 6 muaj pas zgjedhjeve, Bashkia vendos të rrisë tarifat me 30 deri në 100% për qytetarët”, deklaroi Himçi.

Partia Demokratike kërkon transparencë të plotë, analizë të qartë të kostove, shkurtim të administratës dhe ndalimin e shpërdorimit të fondeve publike, duke nënvizuar se qytetarët nuk mund të mbajnë “barrën e korrupsionit dhe keqmenaxhimit”.