Partia Demokratike është rikthyer në tryezën e Këshillit të Legjislacionit, ku ka paraqitur dhe nismën e saj ligjore mbi ndryshimet kushtetuese

Kryetari i grupit parlamentar të PD, Alfred Rushaj, deklaroi se pastrimi i politikës nga zyrtarët e lartë dhe politikanët e korruptuar dhe të lidhur me krimin i shërben një qeverisje më të mirë për qytetarët dhe i jep fund modelit të papërshkueshmërisë.

Rushaj e vendosi theksin tek vetingu i politikanëve dhe zyrtarëve të lartë me qëllim që të shkëputen lidhjet e krimit të organizuar me politikën, në mënyrë që t’i hapet rruga demokratizimit të vendit.

“Partia Demokratike ka paraqitur këtë nismë që përfshin në vetvete tre çështje, vetingun e politikanëve, reformën zgjedhore dhe reformën territoriale.

Duke filluar nga e para, vetingu i politikanëve, do doja ta nisja duke theksuar se integriteti i zyrtarëve është premisë për qeverisje demokratike dhe për një shtet të së drejtës. Sipas të dhënave të publikuara, bashkëpunimi mes krimit të organizuar me politikanëve, si dhe korrupsioni janë në nivele alarmante. Procesi i verifikimit të pasurisë bëhet aktualisht vetëm për prokurorët dhe gjyqtarët. Është fakt që procesi i vetingut nuk po aplikohet për politikanët. Ne mendojmë se kjo do të ndikonte në demokratizimin e qeverisjes dhe do të ndalonte aleancat e fshehta para dhe pas zgjedhjeve mes politikanëve dhe krimit të organizuar. Vetingu duhet të aplikohet ndaj zyrtarëve të lartë publikë, ku përfshihet kryeministri, deputetët, ministra, kryebashkiakë dhe zyrtarë të lartë të institucioneve shtetërore.