Arkitekti Përparim Rama do të vazhdojë të drejtojë Bashkinë e Prishtinës edhe për katër vitet e ardhshme, pasi ka fituar garën në balotazhin për kryeqytetin, duke marrë sërish besimin e prishtinasve për të çuar përpara projektet e transformimit urban.

Mandati i parë i Ramës ka qenë i mbushur me sfida politike, pasi shpesh është përballur me pengesat e qeverisë së Vetëvendosjes, e cila – sipas tij – ka bllokuar fonde dhe projekte për Prishtinën, për shkak të përkatësisë së tij politike në Lidhjen Demokratike të Kosovës (LDK). Megjithatë, Rama arriti të ruajë mbështetjen e qytetarëve, duke u vlerësuar për rezultatet konkrete në infrastrukturë, hapësira publike dhe planifikim urban.

Nga Londra në Prishtinë – rrugëtimi i një arkitekti vizionar

Përparim Rama lindi në Prishtinë më 20 janar 1976. Në moshën 16-vjeçare u shpërngul në Mbretërinë e Bashkuar, ku përfundoi studimet për arkitekturë dhe më pas zhvilloi një karrierë të suksesshme ndërkombëtare.
Gjatë më shumë se dy dekadave të punës së tij profesionale, ai ka marrë pjesë në projekte të rëndësishme në Britaninë e Madhe, SHBA, Zvicër, Çeki, Shqipëri dhe vende të tjera.

Në vitin 2012, Rama përfaqësoi për herë të parë Kosovën në Bienalen e Arkitekturës në Venecia me veprën “Punuesi i filigranit”, një projekt që u vlerësua për lidhjen mes trashëgimisë kulturore dhe dizajnit modern.

Hyrja në politikë dhe rruga drejt suksesit

Në maj 2021, kryetari i LDK-së, Lumir Abdixhiku, e prezantoi Përparim Ramën si kandidatin e partisë për Bashkinë e Prishtinës. Ai fitoi zgjedhjet lokale të atij viti në balotazh dhe u bë kryetar i kryeqytetit, duke premtuar zhvillim të qëndrueshëm, hapësira publike më cilësore dhe transparencë në qeverisje.

Në mandatin e tij të parë, Rama u përball me sfida të shumta politike dhe administrative, por edhe me pritshmëritë e larta të qytetarëve. Rezultati i balotazhit të fundit tregon se shumica e prishtinasve vlerësojnë punën e tij dhe i besojnë një mandat të dytë.

Jeta personale

Përparim Rama është i martuar dhe ka tre fëmijë. Ai jeton në Prishtinë me familjen e tij dhe shpesh thekson se “rikthimi në Kosovë” ishte një vendim i vetëdijshëm për t’i dhënë kryeqytetit përvojën e tij ndërkombëtare dhe një vizion të ri urban.