Seanca e sotme gjyqësore përbandi skena tensioni mes të penduarit të drejtësisë Erion Alibej dhe të pandehurit Xhuliano Hoxha. Deklaratat e Alibejt, i cili shpesh u përgjigj me frazën “nuk e mbaj mend”, ndezën nervat e Hoxhës, duke e kthyer sallën e gjyqit në një arenë akuzash të ndërsjella.
Në qendër të debatit u përmend edhe një vajzë e identifikuar si Megi K., ish e dashura e Alibejt. Pikërisht aty shpërtheu Hoxha, i cili iu drejtua të penduarit me tone kërcënuese:
“O Erjon, kujto ndonjë gjë se më plase shpirtin. Pishmani im në jetë është që s’të vrava vetë me dorën time.”
Në një moment tjetër, Hoxha e pyeti nëse kishte dashur të vriste Megi K., ndërsa Alibej iu përgjigj duke përmendur një tjetër emër të njohur të botës së krimit:
“E ke në Peqin Suel Çelën”, tha ai, duke kërkuar njëkohësisht ndjesë ndaj avokatit Sokol Hazizaj, i cili mbron Çelën në një proces tjetër.
Por deklarata që tronditi sallën ishte ajo kur Alibej u pyet nëse do të bashkëpunonte përsëri me Nuredin Dumanin dhe Xhuliano Hoxhën për eliminimin e Talo Çelës.
Përgjigjja e tij ishte e prerë:
“Edhe me djallin për Talo Çelën.”
Seanca pritet të vijojë me dëshmi të tjera, ndërsa tensionet mes palëve vetëm sa po rriten, duke nxjerrë në pah konfliktet e thella brenda botës së krimit të organizuar.
