Presidenti i Republikës së Shqipërisë, Bajram Begaj, po zhvillon një vizitë zyrtare në Shtetet e Bashkuara të Amerikës, ku ka marrë pjesë në një forum ndërkombëtar të organizuar nga Universiteti “Texas A&M” dhe Shkolla “George Bush” për Qeverisje dhe Shërbim Publik.

I ftuar nderi në aktivitetin me temë “The American Dream at 250: Still Within Reach?”, kreu i shtetit shqiptar mbajti një fjalë ku u ndal te historia e demokracisë, lidershipi dhe roli i SHBA-ve në rendin global.

Duke folur para studentëve dhe akademikëve, Begaj e përshkroi rrugëtimin e tij personal si “një mjek që u bë ushtarak dhe më pas president”, duke e vendosur këtë përvojë në kontekstin e transformimit të Shqipërisë nga izolimi në demokraci.

Ai kujtoi periudhën e komunizmit, duke theksuar izolimin e vendit dhe simbolikën e mbi 700 mijë bunkerëve, si dhe ndryshimet që sollën vitet ’90, kur shqiptarët “dolën në rrugë duke kërkuar liri”.

Në fjalën e tij, Presidenti nënvizoi edhe zgjedhjen strategjike të Shqipërisë për t’u afruar me SHBA-në pas rënies së regjimit, duke e cilësuar Amerikën si “partner dhe pikë referimi”.

“Ëndrra amerikane mbetet ende e arritshme”, u shpreh Begaj, duke theksuar se ajo vijon të shërbejë si frymëzim për shoqëritë që synojnë lirinë dhe zhvillimin demokratik.

Gjatë vizitës në Teksas, Presidenti është pritur edhe në takime me përfaqësues lokalë, ndërsa është nderuar me “Çelësin e Qytetit” nga Bashkia e Conroe-s, si shenjë vlerësimi për kontributin në marrëdhëniet dypalëshe.

Vizita e tij në SHBA vijon me takime të tjera institucionale dhe akademike.