Ministri i Mbrojtjes, Ermal Nufi, është përballur në interpelancë në Kuvend me deputetin e Partisë Demokratike Klevis Balliu, ku në fokus ishte funksionimi dhe struktura e shoqërisë shtetërore KAYO.

Gjatë seancës, Nufi sqaroi se qeveria shqiptare po zhvillon një model të tipit “holding” për industrinë e mbrojtjes, ku KAYO nuk funksionon si prodhues i drejtpërdrejtë, por si strukturë koordinuese dhe licencuese në bashkëpunim me partnerë privatë vendas dhe të huaj.

Sipas ministrit, shoqëria është 100% në pronësi të Ministrisë së Mbrojtjes dhe synon të nxisë zhvillimin e industrisë ushtarake përmes partneriteteve dhe kapitaleve private, duke ndjekur praktika të ngjashme me modele ndërkombëtare.

“Qëllimi është që përmes bashkëpunimit me kompani private të krijohet një industri e qëndrueshme e mbrojtjes, e aftë për të prodhuar pajisje për Forcat e Armatosura dhe për eksport”, u shpreh Nufi.

Ai theksoi gjithashtu se industria ushtarake është një sektor i rregulluar rreptësisht dhe me standarde të larta kontrolli, duke kërkuar bashkëpunim shtet–shtet në shumë raste.

Ministri shtoi se modeli i KAYO-s nuk është një eksperiment vendas, por pjesë e praktikave të përdorura edhe në vende të tjera, ndërsa synimi kryesor është rrjetëzimi i kapaciteteve ekzistuese të industrisë ushtarake në Shqipëri dhe forcimi i rolit të vendit brenda NATO-s.