Një qytetar nga Vlora ka publikuar një reagim të gjatë në rrjetet sociale, ku rendit arsyet pse thotë se mbështet protestat kundër qeverisë dhe mënyrës së administrimit të pasurive publike në qytetin bregdetar dhe më gjerë.

Në mesazhin e tij, ai ngre akuza dhe shqetësime për një sërë projektesh, pronash publike, investimesh, koncesionesh dhe zhvillimesh urbanistike që, sipas tij, kanë përfunduar në duart e një grupi të kufizuar biznesmenësh dhe personash me ndikim politik.

“Jo vetëm për Zvërnecin”, shkruan ai në nisje të reagimit, duke renditur më pas dhjetëra çështje që lidhen me Vlorën, përfshirë Portin e Vlorës, Triportin, Pashalimanin, Akërninë, Sheshin e Flamurit, Universitetin, Hipotekën, Spitalin Rajonal dhe zona të tjera publike.

Qytetari ndalet edhe te problematikat sociale dhe ekonomike, duke përmendur pensionet e ulëta, mungesën e investimeve në infrastrukturë, sistemin shëndetësor, ndotjen e mjedisit dhe emigracionin masiv.

“Për 50 milionë eurot që do na sillnin ujin dhe ujë s’kemi. Për miliardat që do na sillnin rrugë e rrugë s’kemi. Për spitalet që na vdesin, jo na shërojnë”, shkruan ai.

Në pjesën më personale të mesazhit, autori tregon edhe përvojën e tij me sistemin shëndetësor, duke thënë se pas pesë vitesh probleme shëndetësore është detyruar të kërkojë zgjidhje në Greqi.

“Unë protestoj për veten që pas 5 vitesh sëmurë, u desh të shkoja në Janinë të gjeja zgjidhje. Protestoj për babain e nënën time që më shikojnë në sy mos u jap unë ndonjë lekë të pijnë kafe.”

Ai shton se proteston edhe për familjet që, sipas tij, janë larguar nga banesat e tyre për t’i hapur rrugë projekteve të zhvillimit, si dhe për qytetarët që ankohen çdo ditë, por nuk guxojnë të flasin publikisht.

Mesazhi mbyllet me një deklaratë të drejtpërdrejtë:

“Unë nga Vlora për këto protestoj! Protestoj dhe për ata dhjetra njerëz që më shkruajnë përditë, duke u ankuar… por anonim nga frika.”

Postimi po shpërndahet gjerësisht në rrjetet sociale në një kohë kur protestat në Tiranë dhe qytete të tjera të vendit vijojnë prej ditësh, duke mbledhur qytetarë me kërkesa dhe shqetësime të ndryshme.