Nga paraburgimi i Durrësit, Erion Veliaj drejton narrativën publike, komenton dëshmitë kundër tij dhe flet për emra si shoferi personal i Ajolës dhe arkitekti Ols Efthimi.
Tiranë, 6 Prill 2025 – Në një tjetër sekuencë të përgjuar nga SPAK dhe publikuar së fundmi në media, kryebashkiaku i pezulluar i Tiranës, Erion Veliaj, shfaqet duke udhëzuar bashkëshorten e tij, Ajola Xoxa, për mënyrën si të sillet në publik dhe si të reagojë ndaj zhvillimeve të hetimit.

Nga kabina e paraburgimit të Durrësit, Veliaj flet me Ajolën në lidhje me një shtetas të quajtur Marsel – ish-shofer personal i saj – i cili ka dhënë dëshmi dhe ka dorëzuar mesazhe në SPAK. Sipas Veliajt, në vendimin prej mbi 300 faqesh të Gjykatës së Posaçme, përmenden komunikime mes Marselit dhe një tjetër personi të identifikuar si Olsi, që besohet të jetë arkitekti Ols Efthimi.

“Pse Mandi (Marseli) duhet të pyesë Olsin ‘kur do dalim, kur do shkojmë në Qerret, kur do zbresësh lart, kur do ikësh poshtë’…?”, thotë Veliaj gjatë bisedës, duke aluduar për një raport të dyshimtë mes palëve.

Ajola, nga ana e saj, e justifikon komunikimin duke thënë se biseda ishte për rregullimin e tarracës dhe se pyetjet ishin teknike. Ajo e kundërshton Veliajn duke e pyetur: “Pse pyet? Se çfarë muhabeti është ky që më bën…”

Në vazhdim të bisedës, Erion Veliaj e pyet nëse i ka dhënë dorën prokurorit në seancën e fundit, në ditën e paraqitjes së saj në Prokurori. Ajola përgjigjet “Jo”, ndërsa Veliaj reagon me gjuhë fyese, duke thënë:

“Ai është qelbësirë! S’duhet me i dhënë dorën. S’meriton as mirësjellje.”

Kjo bisedë shfaq qartë një përpjekje të Veliajt për të kontrolluar jo vetëm perceptimin publik të çështjes së tij, por edhe sjelljen e njerëzve më të afërt, përfshirë bashkëshorten. Komentet e tij për prokurorin, dëshmitarët dhe detajet e hetimit tregojnë se edhe nga paraburgimi, ai është i përfshirë thellësisht në ndërtimin e mbrojtjes së tij politike dhe mediatike.

Përfshirja e Marselit dhe Olsit në hetim mbetet për t’u konfirmuar nga autoritetet, ndërsa pritet që ditët në vijim të sjellin zhvillime të reja në dosjen e bujshme që trondit Tiranën politike.