Partia Demokratike e Kosovës ka reaguar pas publikimit të rezultateve preliminare të zgjedhjeve parlamentare, duke akuzuar qeverinë e Albin Kurti për keqqeverisje dhe duke e cilësuar mospjesëmarrjen e një numri të madh qytetarësh në votime si një mesazh të qartë politik ndaj pushtetit.

Në një konferencë për media, sekretarja e PDK-së, Vlora Çitaku, deklaroi se qeverisja e deritanishme ka sjellë zhgënjim dhe kriza të vazhdueshme për qytetarët e Kosovës.

“Qeveria e Albin Kurtit prodhoi zhgënjim të madh te qytetarët dhe kriza të vazhdueshme. Kjo keqqeverisje rezultoi me një protestë zgjedhore, sepse mosdalja në zgjedhje e mbi 200 mijë votuesve tregon zhgënjim të jashtëzakonshëm të qytetarëve. Gara ishte e pabarabartë dhe sikur të mos bënte blerje masive të votës me qindra mijëra premtime ndaj punonjësve shtetërorë, me miliona euro për biletat e diasporës dhe me keqpërdorim të resurseve shtetërore, ky njeri do të pësonte një humbje edhe më të thellë politike”, tha Çitaku.

Ajo pretendoi se gjatë fushatës zgjedhore janë përdorur resurset shtetërore dhe janë bërë premtime të shumta për kategori të ndryshme të elektoratit, duke e cilësuar garën si të pabarabartë.

“Përkundër kësaj gare të pabarabartë, me blerje masive të votave përmes ndihmave dhe keqpërdorimit të resurseve shtetërore, PDK e rikonfirmoi pozicionin e saj përfaqësues me përqindje dhe me numër deputetësh. Është e lehtë të kuptohet se, mes këtyre krizave, ky pushtet i ka lodhur qytetarët dhe kjo mospjesëmarrje është mesazh politik që duhet të merret seriozisht, e posaçërisht nga ky pushtet abuziv. Ne do të presim rezultatet përfundimtare, do të presim numërimin e plotë të votave dhe më pas do t’i bëjmë publike qëndrimet tona”, u shpreh ajo.

PDK ka bërë të ditur se do të presë përfundimin e procesit të numërimit dhe certifikimin zyrtar të rezultateve përpara se të shpallë hapat e mëtejshëm politikë pas zgjedhjeve.