Kryeministri Edi Rama ka reaguar ashpër ndaj vendimit të GJKKO-së për pezullimin nga detyra të zv.kryeministres dhe ministres Belinda Balluku, e cila është marrë e pandehur nga SPAK. Në një komunikim në Facebook, Rama deklaroi se ankimin në Gjykatën Kushtetuese e ka bërë vetë ai, jo si individ, por si kryeministër, duke e cilësuar çështjen si “një betejë institucionale për të mbrojtur balancën mes pushteteve”.

Sipas Ramës, vendimi i pezullimit është de jure pezullim, por de facto shkarkim, pasi i heq ministrit të drejtën e ushtrimit të autoritetit ekskluziv që Kushtetuta i njeh.

“Pezullimi i një ministri me iniciativën e një prokurori dhe vendim të një gjykatësi është një rrëmbim i kompetencës së kryeministrit. Është një absurd i plotë si koncept,” – tha ai.

Rama argumentoi se një vendim i tillë jo vetëm cenon autonominë e ekzekutivit, por krijon një precedent të rrezikshëm:

“Nëse kjo praktikë legjitimohet, atëherë gjyqësori shtrihet përtej kufirit ndarës me ekzekutivin, duke hapur rrugë presioneve politike, destabilizimit institucional dhe manipulimit të qeverisë përmes proceseve penale.”

Kreu i qeverisë u shpreh se në asnjë vend të Evropës nuk ekziston një rast ku një anëtar i kabinetit pezullohet me vendim gjykate.

“Duhet të jesh i papërgjegjshëm ndaj Republikës për të mos e kundërshtuar këtë tentativë antidemokratike në Gjykatën Kushtetuese,” – nënvizoi Rama.

Ai akuzoi opozitën se po e shndërron një konflikt të pastër kompetencash në sulm politik, ndërsa theksoi se padia e tij në GJK synon të mbrojë parimin e ndarjes së pushteteve, jo individët.