Kryeministri Edi Rama ka deklaruar se Shqipëria dhe Greqia po punojnë për një zgjidhje të plotë të të gjitha çështjeve të mbetura pezull mes dy vendeve, me synimin që një marrëveshje përfundimtare të arrihet brenda vjeshtës së ardhshme.

Ai tha se palët kanë vullnet politik për të mbyllur një sërë çështjesh historike, përfshirë edhe atë të detit, për të cilën ekziston dakordësi që t’i drejtohet Gjykatës Ndërkombëtare për zgjidhje përfundimtare.

Edi Rama pranoi se çështja “Beleri” ka krijuar tensione në marrëdhëniet dypalëshe, por theksoi se kjo nuk ka ndalur dialogun me kryeministrin grek Kyriakos Mitsotakis.

Në deklaratën e tij, Rama vuri në dukje edhe rëndësinë e komuniteteve shqiptare në Greqia dhe të minoritetit grek në Shqipëri si faktorë që forcojnë marrëdhëniet mes dy vendeve.

Në aspektin ekonomik, ai tha se po diskutohet bashkëpunimi në sektorin e energjisë dhe mundësia që Shqipëria të shndërrohet në një nyje tranziti për gazin natyror drejt Europës, me interes edhe nga partnerë ndërkombëtarë.

Rama komentoi gjithashtu politikat humanitare të Shqipërisë, duke përmendur pranimin e refugjatëve dhe grupeve të ndryshme në vite si pjesë e traditës së mikpritjes së vendit.