Presidenti amerikan Donald Trump ka deklaruar se Irani po kërkon të mbajë të hapur Ngushticën e Hormuzit për arsye ekonomike dhe politike, duke pretenduar se mbyllja e saj do t’i shkaktonte humbje të mëdha financiare vendit.

Në një reagim në platformën e tij Truth Social, Donald Trump tha se Teherani “dëshiron ta hapë Ngushticën për të shpëtuar fytyrën”, duke shtuar se Irani po humbet të ardhura të konsiderueshme nga situata aktuale.

Ai gjithashtu komentoi zhvillimet diplomatike, duke thënë se Shtetet e Bashkuara po zgjasin armëpushimin për t’i dhënë kohë Iranit të paraqesë një propozim të unifikuar në kuadër të negociatave të ndërmjetësuara nga vende të treta, përfshirë Pakistani.

Sipas tij, Irani ndodhet në vështirësi ekonomike dhe përballet me presion të shtuar ndërkombëtar, ndërsa procesi i bisedimeve mbetet ende i pasigurt.

Deklaratat vijnë në një moment tensionesh të vazhdueshme në rajonin e Gjirit Persik, ku Ngushtica e Hormuzit mbetet një nga pikat më strategjike për transportin global të naftës.