Protesta e 56-të e zhvilluar në bulevard mblodhi edhe këtë të shtunë një numër të madh qytetarësh, të cilët u grumbulluan fillimisht në Sheshin “Skënderbej”, për të vijuar më pas marshimin e tyre.

Mes protestuesve ishte edhe një 78-vjeçar, i cili akuzoi kryeministrin Edi Rama dhe Policinë e Shtetit për dhunën e ushtruar gjatë protestës së fundit pranë Parlamentit.

“Fjalimin e kryeministrit e dëgjova, ai t’i përgjigjet një 78-vjeçari që e plagosi atje, me goditje, me dhunë atje te protesta. Por fjalimet e tij, do marrë patronazhistët e tij, i droguar, sa herë të na dhunojë aq herë do protestojmë. Protestojmë për pensionet, spitalet dhe për të gjitha padrejtësitë që po na bëhen”, u shpreh ai.

Gjatë deklaratës së tij, i moshuari i bëri thirrje kryeministrit të largohet nga drejtimi i vendit, ndërsa reagoi edhe ndaj deklaratave fyese që, sipas tij, janë bërë ndaj protestuesve.

“Korbat dhe sorrat janë ata në Kryeministri, korbat e laraskat janë ata atje në Kryeministri, janë laraska nëpër bodrume se kanë frikë nga qytetarët e vetë. Ai është me Vuçiçin, është serb, kriminel, vetëm shqiptar nuk është ai. Të vret natën e të qan ditën, si ia bëri kolegut tuaj në Vlorë, nuk ishte aksidentalisht ajo”, deklaroi qytetari.

Protestat e opozitës dhe qytetarëve vijojnë prej 56 ditësh radhazi, ndërsa pjesëmarrësit kërkojnë largimin e qeverisë, zgjedhje të parakohshme dhe reagim ndaj problematikave që, sipas tyre, prekin jetën e përditshme të qytetarëve.