Deputetja e Partisë Socialiste, Sara Mila, dhe aktivisti Ilir Xhemalaj janë përplasur në emisionin “Off the Record” në A2 CNN, ku debatuan për karakterin e protestës së zhvilluar kundër qeverisë dhe për raportin e saj me Partinë Demokratike.

Mila ngriti dyshime mbi pretendimin se protesta është një lëvizje anti-establishment, duke argumentuar se pjesëmarrja dhe mobilizimi lidhen me mbështetjen e Partisë Demokratike. Ajo u ndal edhe te fakti që protestuesit, sipas saj, nuk kanë drejtuar vezë apo sende të tjera ndaj përfaqësuesve të opozitës.

Deputetja socialiste sfidoi organizatorët që të krijojnë një alternativë të pavarur politike dhe të garojnë në zgjedhje pa mbështetjen e Partisë Demokratike.

Sara Mila:
“Ka një kontradiktë shumë të madhe në atë çfarë artikulohet. Fillimisht, funksionarët e Partisë Demokratike janë pjesë e protestës apo jo? Sepse shumë prej atyre të cilët sot Policia e Shtetit edhe arrestoi, janë në fakt funksionarë të Partisë Demokratike.”

Ajo kërkoi një sqarim nga organizatorët nëse ish-kryeministri Sali Berisha dhe Partia Demokratike janë pjesë e kësaj proteste apo jo.

“E doni, e keni Berishën pjesë të protestës apo është edhe Berisha ai për të cilin ju po protestoni? Nëse Berisha dhe Partia Demokratike janë pjesë e establishmentit dhe nuk janë pjesë e juaja, atëherë mos toleroni asnjë funksionar të Partisë Demokratike të rrëmbejë protestën.”- u shpreh Mila.

Nga ana tjetër, aktivisti Ilir Xhemalaj mohoi përfshirjen e strukturave të Partisë Demokratike në organizimin e protestës dhe deklaroi se tubimi është një lëvizje qytetare.

Ilir Xhemalaj:
“Në grupin tonë organizator nuk ka asnjë eksponent të Partisë Demokratike. Në grupin tonë, si qytetarë të lirë mund të vijë kushdo.”

Xhemalaj shtoi se, sipas tij, shumica e protestuesve nuk janë pjesë e PD-së.

“Këtu shumica e protestuesve, me sa njoh unë, janë nga PS-ja, nuk janë të Partisë Demokratike.”- tha ai.

Mila reagoi duke vënë në pikëpyetje mënyrën se si identifikohen bindjet politike të një numri të madh protestuesish.

“Si i identifikoni 300 mijë njerëz? O keni 10 njerëz dhe prandaj i identifikoni, se po të jenë 300 mijë nuk i identifikoni dot. Ose keni sistem patronazhimi që është pak kontradiktor.”- u shpreh deputetja.

Në vijim të debatit, Xhemalaj këmbënguli se protesta nuk kontrollohet nga asnjë parti politike dhe tha se pjesëmarrësit kanë kundërshtuar të gjithë deputetët.

“Ne kemi gjuajtur vezë mbi çdo deputet që ka dalë nga dera e Parlamentit. Ata një herë nuk i njeh njeri kush janë. Janë njerëz se s’i njeh as lagja e tyre. Janë të futur në lista partish dhe nuk kanë marrë asnjë votë nga populli.”- deklaroi ai.

Debati u përqendrua te pyetja nëse protesta përfaqëson një lëvizje të pavarur qytetare apo nëse ajo ka lidhje me opozitën tradicionale, ndërsa palët vijuan të mbajnë qëndrime të kundërta.