Policia greke ka arrestuar katër persona të dyshuar për vrasjen e mafiozit Jorgos Moskouris, ngjarje e ndodhur në prill 2025 në Halandri.

Operacioni u zhvillua të martën, më 6 maj, pas një hetimi disamujor nga Departamenti i Vrasjeve, ku të arrestuarit akuzohen se kanë qenë grupi mbështetës për autorët e krimit që ekzekutuan 55-vjeçarin jashtë një klinike private në Halandri, më 24 prill 2025.

Sipas autoriteteve, të arrestuarit janë dy shtetas grekë me origjinë shqiptare, Dhionis Kokoni dhe një person me mbiemrin Jupe, si dhe dy grekë të tjerë, Dhimitris Aleksopoulos dhe Aleksandros Petropoulos.

Policia vlerëson se katër të dyshuarit kishin marrë përsipër pjesën operative të vrasjes, duke siguruar armë, automjete, transport dhe mbështetje për ekzekutorët e huaj që mbërritën në Greqi ekskluzivisht për atentatin dhe u larguan menjëherë pas krimit.

Hetimet e policisë greke janë përqendruar tani tek i ashtuquajturi “Entik”, i konsideruar si figurë kyçe në mafian rusishtfolëse dhe që dyshohet se ndodhet në Dubai. Autoritetet besojnë se urdhri për vrasjen e Moskouris lidhet me konfliktet për kontrollin e kontrabandës së duhanit, aktivitet ku thuhet se “Thamnakias” ishte përfshirë kohët e fundit.

Sipas policisë, në hetim përfshihet edhe Janis Lalas, i cili kishte bashkëpunuar më parë me viktimën përpara se marrëdhëniet mes tyre të prisheshin. Burime policore thonë se vëllezërit Lalas u lidhën më pas me grupin “Entik”, ndërsa po shqyrtohet mundësia e përfshirjes së tyre në ekzekutim.

Katër të arrestuarit përballen edhe me akuza për raste të tjera të krimit të organizuar, përfshirë një shpërthim në një shitës makinash në Nea Erythraia në gusht 2024, kompani që dyshohet se kishte lidhje me Moskouris. Ata akuzohen gjithashtu për shkelje të të dhënave personale, pasi dyshohet se kishin vendosur një pajisje GPS në automjetin e një avokateje të lidhur me një udhëheqës të burgosur të mafias greke.

Policia ka zbuluar edhe kamera mbikëqyrjeje pranë banesës së saj, çka ka shtuar dyshimet se po planifikohej një tjetër atentat mafioz.

Pavarësisht arrestimeve, autorët e drejtpërdrejtë të ekzekutimit mbeten ende në arrati. Autoritetet greke po kërkojnë të paktën dy persona të huaj, të cilët dyshohet se kanë vepruar me profesionalizëm të lartë.

Mënyra e atentatit kishte ngritur që në fillim dyshime për përfshirjen e mafias rusishtfolëse. Egërsia e sulmit, përdorimi i kallashnikovit dhe shpërfillja për viktima të mundshme kolaterale u konsideruan karakteristika të ekzekutimeve tipike të qarqeve kriminale të Europës Lindore.

Oficerët e policisë kujtojnë se skema të ngjashme janë përdorur edhe në vrasjet e Zambounis, Roumpetis, Mouzakitis dhe Skaftouros, raste që i atribuohen grupeve rivale të mafias greke.

Vrasja e Jorgos Moskouris ndodhi pasditen e 24 prillit 2025, jashtë një klinike private në Halandri. Autorët kishin ngritur pritë dhe hapën zjarr me kallashnikov ndërsa viktima po shkonte drejt automjetit të tij.

55-vjeçari mbeti i vdekur në trotuar, ndërsa autorët u arratisën me një automjet që më vonë u gjet i djegur në Patima të Halandrit. Makina rezultoi e vjedhur nga një grua, e cila ende nuk kishte arritur ta denonconte grabitjen në polici.