Drejtoresha e Agjencisë Kombëtare të Turizmit (AKT), Zana Çela, mori pjesë në Samitin e IV të Diasporës Shqiptare në panelin “Roli i diasporës në promovimin e Turizmit”, ku theksoi se Shqipëria po kalon një fazë të rëndësishme zhvillimi në sektorin e turizmit.

Në fjalën e saj, ajo u shpreh se gjatë 3–4 viteve të fundit është rritur ndjeshëm numri i vizitorëve, por sipas saj ndryshimi më i madh lidhet me cilësinë e përvojës që turistët po marrin në Shqipëri.

“Nga një vend i panjohur, sot vizitorët vijnë në Shqipëri të kërkojnë autenticitetin e saj, natyrën e paprekur, trashëgiminë kulturore dhe gastronominë”, tha Çela.

Ajo vlerësoi se promovimi i vendit është në një fazë të re, duke u fokusuar te krijimi i një identiteti turistik më të veçantë dhe të dallueshëm në rajon.

“Është një moment kyç për të rrëfyer Shqipërinë si një destinacion turistik autentik mesdhetar dhe global”, u shpreh ajo.

Sipas saj, AKT ka ndryshuar qasjen e promovimit, duke kaluar nga format tradicionale informuese drejt metodave më moderne të bazuara në storytelling dhe përvojë.

“Shqipëria ka pësuar një zhvillim të madh fizik të turizmit, ku rol kyç ka luajtur infrastruktura dhe zhvillimi i resorteve në bregdet, por edhe në veri dhe në Shqipërinë e mesme”, shtoi Çela.

Ajo nënvizoi gjithashtu pjesëmarrjen në panaire ndërkombëtare si ITB Berlin, Madrid dhe Londër, duke theksuar se promovimi fizik dhe ai digjital po ecin paralelisht në strategjinë e turizmit shqiptar.