Një vendim i paprecedentë tronditi këtë javë organizatën e “Miss Finlanda”, e cila hoqi menjëherë titullin fitueses së vitit 2025, Sarah Dzafce, 22-vjeçare me origjinë shqiptare nga Kosova. Ky është rasti i parë në historinë e kompeticionit finlandez që fituesja humb zyrtarisht kurorën e saj.

Ngjarja ndodhi më 1 dhjetor, pasi media finlandeze Ilta-Sanomat publikoi një imazh të Sarah-s që po qarkullonte me shpejtësi në Snapchat dhe Instagram. Në foto, ajo shihej duke tërhequr sytë me gishta për t’u dukur “të pjerrët”, një gjest i njohur ndërkombëtarisht si tallës ndaj komuniteteve aziatike. Mbishkrimi në finlandisht “Kiinalaisenkaa syömäs” (“Duke ngrënë me një kinez/ushqim kinez”) u konsiderua përmbajtje raciste dhe shkaktoi një reagim të fortë publik.

CEO e konkursit, Sunneva Sjögren, shpalli vendimin në një konferencë për shtyp, duke theksuar: “Ky ishte një vendim i arsyetuar dhe i vështirë. Sjelljet diskriminuese nuk janë të tolerueshme për një figurë që përfaqëson vendin në skenën ndërkombëtare.”

Sarah Dzafce, e cila shpesh shprehej me krenari për rrënjët e saj në Kosovë, u shfaq e tronditur nga lajmi. Ajo u shpreh për mediat:

“Nuk e prisja. E mora vesh këtë mëngjes. Vendimi u mor me mirëkuptim të ndërsjellë.”

Ky vendim është i paprecedentë për “Miss Finlanda” dhe tregon zero tolerancë ndaj sjelljeve që mund të perceptohen si diskriminuese ose raciste, duke reflektuar presionin e opinionit publik dhe rregullat strikte etike të konkursit.