Shtetet e Bashkuara dhe Iran thuhet se janë pranë arritjes së një marrëveshjeje për zgjatjen me 60 ditë të armëpushimit, ndërsa negociatat mbi programin bërthamor iranian vijojnë me tensione dhe pa një miratim përfundimtar nga presidenti amerikan Donald Trump.

Sipas burimeve në Uashington, të cituara nga AFP, palët kanë rënë dakord mbi një kornizë paraprake që synon krijimin e kohës së nevojshme për negociata më të thelluara mbi programin bërthamor të Teheranit dhe përpjekjet për uljen e tensioneve në Lindjen e Mesme.

Megjithatë, drafti nuk është miratuar ende nga Trump, ndërsa pala iraniane mohon ekzistencën e një teksti përfundimtar.

Agjencia iraniane Tasnim, duke cituar burime nga ekipi negociator iranian, raportoi se informacionet mbi marrëveshjen janë të parakohshme.

“Kjo është e rreme. Teksti nuk është finalizuar ende”, deklaroi burimi i cituar nga media iraniane.

Ndërkohë, zëvendëspresidenti amerikan JD Vance konfirmoi se negociatat po vazhdojnë, por theksoi se disa çështje kyçe mbeten ende të hapura.

“Mendoj se është e vështirë të thuhet saktësisht se kur ose nëse presidenti do ta nënshkruajë memorandumin e mirëkuptimit. Po debatojmë për disa nga formulimet”, deklaroi Vance.

Ai përmendi veçanërisht mosmarrëveshjet mbi rezervat e uraniumit të pasuruar dhe të ardhmen e programit të pasurimit bërthamor të Iranit.

“Ka disa çështje që lidhen me programin bërthamor, rezervat e uraniumit të pasuruar shumë, por edhe çështjen e pasurimit. Ne vazhdojmë të diskutojmë me ta”, tha Vance, duke shtuar se Uashingtoni beson se Teherani po negocion me mirëbesim.

Sipas Axios, memorandumi që po diskutohet nuk e zgjidh përfundimisht çështjen e programit bërthamor iranian, por parashikon që tema të trajtohet gjatë periudhës 60-ditore të armëpushimit.

Në të njëjtën kohë, tensionet në rajon mbeten të larta. Irani pretendoi se ka lëshuar raketa dhe ka rrëzuar një avion amerikan në provincën Bushehr, pretendime që janë mohuar nga Uashingtoni.

Paralelisht, operacionet ushtarake izraelite në Liban vijojnë, duke mbajtur situatën në Lindjen e Mesme në një gjendje të tensionuar dhe të paqëndrueshme.