Me rritjen e numrit të vizitorëve gjatë sezonit veror, strukturat inspektuese do të intensifikojnë kontrollet në subjektet që tregtojnë dhe përpunojnë produkte ushqimore, me qëllim garantimin e standardeve të sigurisë dhe cilësisë për banorët dhe turistët.

Inspektori i Përgjithshëm, Dash Sula, gjatë një prononcimi për mediat bëri me dije se siguria ushqimore do të jetë një nga prioritetet kryesore të masave të ndërmarra në qarkun e Dibrës, ndërsa kontrollet do të shtrihen edhe në fusha të tjera me rëndësi për zonën.

Sipas Sulës, një vëmendje e veçantë do t’i kushtohet sigurisë në miniera, veçanërisht në Bashkinë Bulqizë, e njohur për aktivitetin e nxjerrjes së kromit.

“Bashkia Bulqizë, e njohur për aktivitetin e saj në nxjerrjen e kromit, mbetet një ndër zonat me prioritet të lartë inspektimi. Gjatë vitit 2026 janë regjistruar vetëm 3 aksidente në punë në minierat e Bulqizës, pa asnjë pasojë në humbje jete, shifër që tregon efektin e masave të deritanishme, por që kërkon vigjilencë të vazhdueshme”, deklaroi Sula.

Ai shtoi se do të shtohen kontrollet në subjektet minerare për respektimin e standardeve të sigurisë në punë, gjendjen teknike të galerive dhe pajisjeve, si dhe për parandalimin e aksidenteve.

Në fokus të inspektimeve do të jetë edhe kontrolli veterinar dhe importi i gjësë së gjallë, për shkak të rolit që ka qarku i Dibrës si zonë kufitare me Maqedoninë e Veriut.

“Qarku i Dibrës mban një peshë të veçantë për shkak të pikës kufitare që lidh vendin me Maqedoninë e Veriut, nëpërmjet së cilës kalon një vëllim i konsiderueshëm i importit të gjësë së gjallë”, tha Inspektori i Përgjithshëm.

Sula bëri me dije se do të forcohen kontrollet veterinare kufitare, duke synuar respektimin e protokolleve shëndetësore dhe të karantinës, për të parandaluar hyrjen e sëmundjeve infektive dhe për të garantuar cilësinë e produkteve me origjinë shtazore.

Sa i përket masave parandaluese ndaj zjarreve, Inspektori i Përgjithshëm kërkoi bashkëpunim mes institucioneve dhe angazhim maksimal gjatë sezonit të thatë, veçanërisht në zonat malore dhe pyjore të qarkut.

Ndërkohë, lidhur me sigurinë rrugore, Sula u shpreh se me rritjen e fluksit turistik drejt zonave si Peshkopia, Bulqiza dhe Maqellara, do të monitorohet gjendja e akseve rrugore dhe respektimi i kufizimeve për mjetet me tonazh të lartë.

Për mbrojtjen e mjedisit, ai deklaroi se kontrollet do të shtohen ndaj subjekteve që operojnë pranë burimeve ujore dhe zonave natyrore, me qëllim parandalimin e ndotjes nga aktiviteti minerar dhe industrial.

Dash Sula theksoi se bashkëpunimi ndërinstitucional mbetet thelbësor për zbatimin e masave dhe garantoi se strukturat inspektuese do të jenë prezente në terren gjatë gjithë sezonit, me fokus të veçantë në zonat me risk më të lartë.