Policia e Shtetit ka finalizuar operacionin e koduar “Banka e Rreme 2”, në kuadër të goditjes së mashtrimeve online dhe krimit kibernetik.

Sipas autoriteteve, operacioni u zhvillua pas identifikimit të një skeme mashtruese të tipit “smishing”, ku qytetarëve u dërgoheshin mesazhe SMS në emër të një banke të nivelit të dytë, duke iu kërkuar përditësimi i të dhënave bankare përmes një linku fals që imitonte faqen zyrtare të institucionit financiar.

Nga hetimet rezulton se disa qytetarë kanë rënë pre e mashtrimit, duke dhënë të dhënat e tyre bankare.

Falë ndërhyrjes së Drejtorisë për Hetimin e Krimeve Kibernetike, në bashkëpunim me Policinë e Tiranës dhe Prokurorinë, u bë i mundur identifikimi dhe ndalimi i shtetasit I.K., 25 vjeç, me nënshtetësi holandeze, i dyshuar si autor i skemës kriminale.

Po ashtu, policia ka shpallur në kërkim edhe shtetasin A.R., i dyshuar si bashkëpunëtor në këtë aktivitet të paligjshëm.

Materialet procedurale janë referuar në Prokurorinë e Tiranës për veprat penale “Mashtrimi kompjuterik” dhe “Falsifikimi kompjuterik”.

Policia e Shtetit u ka bërë apel qytetarëve që të tregojnë kujdes maksimal ndaj mesazheve apo linkeve të dyshimta që kërkojnë të dhëna personale ose bankare.

“Asnjë institucion bankar nuk kërkon përditësim të të dhënave sensitive nëpërmjet SMS-ve ose linkeve të dërguara në telefon”, theksohet në njoftimin e policisë.