Një 52-vjeçar shqiptar është arrestuar në Itali pasi akuzohet se përplasi për vdekje një këmbësor dhe u largua nga vendi i aksidentit, ndërsa analizat treguan se drejtonte mjetin nën efektin e kokainës dhe me nivel alkooli katër herë mbi limitin e lejuar.

Ngjarja e rëndë ndodhi më 27 prill në Castel d’Aiano, në provincën e Bolonjës, ku shqiptari, duke drejtuar një automjet tip “Mercedes GLC 250”, goditi për vdekje 69-vjeçarin Gaetano Martone.

Sipas mediave italiane, pas përplasjes ai nuk ndaloi për t’i dhënë ndihmë viktimës, por u largua nga vendi i aksidentit, duke braktisur automjetin rreth 500 metra më tej. Makina u gjet me xham të thyer, gjurmë gjaku dhe airbag të hapur, ndërsa drejtuesi ishte zhdukur.

Hetimet paraprake tregojnë se 52-vjeçari tentoi të humbte gjurmët duke u larguar në këmbë përmes fushave, por karabinierët arritën ta identifikonin dhe lokalizonin brenda një kohe të shkurtër.

Fillimisht ai u arrestua për akuzat e vrasjes rrugore, largimit nga vendi i aksidentit dhe mosdhënies së ndihmës, ndërsa më pas u vendos në arrest shtëpie.

Sipas raportimeve, shqiptari refuzoi fillimisht t’i nënshtrohej alkooltestit të policisë, por më vonë pranoi të dërgohej në spital për analizat e gjakut.

Rezultatet e laboratorit të AUSL Romagna zbuluan se ai kishte nivel alkooli 2.0 gramë për litër gjak dhe rezultoi pozitiv edhe për një metabolit të kokainës.

Për këtë arsye, ndaj tij janë shtuar edhe akuzat për drejtim automjeti nën efektin e alkoolit dhe lëndëve narkotike.

Sipas hetimeve, viktima po ecte drejt qendrës së qytetit kur u godit nga automjeti. Kalimtarët njoftuan menjëherë ambulancën, por 69-vjeçari nuk arriti t’u mbijetonte plagëve.

Ndërkohë, shqiptari ka mohuar fillimisht përfshirjen në aksident, duke pretenduar para hetuesve se kishte dalë nga rruga, por nuk kishte goditur askënd. Megjithatë, provat e gjetura në automjet dhe analizat laboratorike, sipas autoriteteve italiane, kanë rrëzuar versionin e tij.