Booking.com ka konfirmuar një incident të ri sigurie, pas zbulimit të një aktiviteti të dyshimtë që lidhet me akses të paautorizuar në sistemet e saj.

Sipas kompanisë me seli në Amsterdam, persona të jashtëm kanë arritur të kenë qasje në disa të dhëna të rezervimeve të klientëve, përfshirë emra, adresa emaili, numra telefoni dhe informacione të tjera të lidhura me akomodimet.

Megjithatë, kompania thekson se të dhënat financiare nuk janë prekur nga sulmi. Menjëherë pas zbulimit të incidentit, janë ndërmarrë masa sigurie, përfshirë përditësimin e kodeve të aksesit dhe njoftimin e përdoruesve të prekur.

Ende nuk është bërë publike shifra e saktë e klientëve të prekur, por duke pasur parasysh shkallën globale të platformës, ndikimi i mundshëm konsiderohet i gjerë.

Ky nuk është rasti i parë për kompaninë, e cila edhe më herët është përballur me incidente të ngjashme sigurie, përfshirë sulme phishing ndaj sistemeve të partnerëve të saj në sektorin e hotelerisë.

Ekspertët e sigurisë kibernetike paralajmërojnë përdoruesit të tregojnë kujdes ndaj komunikimeve të dyshimta që kërkojnë verifikim të të dhënave personale apo pagesave jashtë platformës zyrtare.