Policia e Shtetit, në bashkëpunim me autoritetet austriake dhe me mbështetjen e Europol, ka finalizuar operacionin e koduar “Ghost Call”, të drejtuar kundër një rrjeti të dyshuar për mashtrime kompjuterike.

Hetimi, që ka zgjatur rreth dy vite, ka nisur pas një kërkese informacioni nga Austria, ndërsa ka zbuluar një skemë të organizuar që dyshohet se ka mashtruar shtetas të huaj përmes platformave online.

Me vendim të Tirana, janë ushtruar kontrolle në disa ambiente dhe banesa të personave të dyshuar, ku në momentin e ndërhyrjes janë konstatuar individë që ushtronin aktivitet të dyshuar kriminal.

Në total janë caktuar 9 masa sigurie: 7 persona në arrest me burg, 2 të shpallur në kërkim, si dhe masa të tjera kufizuese për dy persona të tjerë.

Gjatë operacionit janë sekuestruar rreth 891 mijë euro cash, si dhe një numër i madh pajisjesh elektronike, përfshirë kompjuterë dhe telefona që dyshohet se përdoreshin për mashtrime online.

Aksioni është zhvilluar në disa ambiente njëkohësisht, duke u konsideruar nga autoritetet si një nga operacionet më të rëndësishme në këtë fushë në Shqipëri.

Hetimet vijojnë për identifikimin e personave të tjerë të përfshirë dhe për zbardhjen e plotë të aktivitetit kriminal.