SPAK ka intensifikuar hetimet për procedimin penal nr. 17, që lidhet me dy tendera të zhvilluar nga Ministria e Shëndetësisë, ku dyshohet për një skemë të mirëorganizuar korrupsioni.

Sipas burimeve, organi i akuzës u ka komunikuar akuzën dy personave, identiteti i të cilëve mbahet ende sekret për shkak të hetimeve në vijim. Në qendër të çështjes ndodhet biznesmeni Besnik Halili, pronar i kompanisë “G.T.S – Gazra Teknike Shqiptare”.

Hetimet paraprake sugjerojnë se procedurat tenderuese mund të kenë qenë të paracaktuara, përmes bashkëpunimit mes zyrtarëve të Ministrisë së Shëndetësisë dhe përfaqësuesve të kompanive private, me qëllim shpalljen fituese të operatorëve të caktuar.

Bëhet fjalë për dy tendera të vitit 2019, me vlera që arrijnë rreth 2 miliardë lekë secili, të ndarë në dhjetëra lote dhe të realizuara përmes marrëveshjeve kuadër me afat 12-mujor furnizimi.

Në kuadër të hetimeve, më 20 maj 2024, SPAK dhe Byroja Kombëtare e Hetimit ushtruan kontrolle në ambientet e kompanisë, ku u sekuestruan dokumente dhe pajisje elektronike që pritet të ndihmojnë në zbardhjen e plotë të skemës.

Burime të hapura përmendin gjithashtu dyshime për lidhje të biznesmenit me organizatën kriminale ’Ndrangheta, si dhe ndikim të mundshëm në procedura të tjera publike, përfshirë furnizimin e spitaleve me oksigjen.

Ndërkohë, hetimet vijojnë për të identifikuar të gjithë personat e përfshirë dhe për të dokumentuar përgjegjësitë penale në këtë aferë që pritet të ketë jehonë të gjerë.