Udhëheqësi suprem i Iranit, Ajatollah Ali Khamenei, ka lëshuar një mesazh të ashpër ndaj Shteteve të Bashkuara, në një kohë tensionesh të vazhdueshme mes Teheranit dhe Uashingtonit dhe ndërsa mbetet e paqartë perspektiva për një marrëveshje të re mes palëve.

Përmes një postimi në rrjetet sociale, Khamenei i ka cilësuar Shtetet e Bashkuara si “tigra letre”, duke pretenduar se ato nuk janë në gjendje të mbrojnë as bazat e tyre ushtarake dhe duke vënë në dyshim aftësinë e tyre për të garantuar sigurinë e aleatëve në rajon.

Sipas mediave ndërkombëtare, deklarata e tij ka ardhur pas një mesazhi të mëhershëm të drejtuar SHBA-së me rastin e Ditës Kombëtare të Gjirit Persik, ku ai ka folur për një “kapitull të ri” në rajon dhe për rolin e Iranit në sigurimin e stabilitetit në zonën e Gjirit Persik dhe Ngushticës së Hormuzit.

Khamenei ka theksuar gjithashtu se prania amerikane është, sipas tij, një nga shkaqet kryesore të pasigurisë në Lindjen e Mesme, duke shtuar se stabiliteti mund të arrihet vetëm me largimin e tyre nga rajoni.