Presidenti i Shteteve të Bashkuara, Donald Trump, ka njoftuar rritjen e tarifave doganore për makinat dhe kamionët që importohen nga Bashkimi Evropian në masën 25%, duke filluar nga java e ardhshme.

Sipas deklaratës së tij, vendimi vjen për shkak të mosrespektimit të një marrëveshjeje tregtare nga ana e BE-së.

Trump theksoi se masa është në përputhje me marrëveshjet ekzistuese dhe synon të nxisë prodhimin brenda SHBA-së, duke shtuar se kompanitë evropiane që hapin fabrika në territorin amerikan nuk do të përballen me tarifa.

“Kam kënaqësinë të njoftoj se, bazuar në faktin se Bashkimi Evropian nuk po i përmbahet Marrëveshjes sonë të Tregtisë të dakordësuar plotësisht, javën tjetër do të rris tarifat e ngarkuara ndaj Bashkimit Evropian për makinat dhe kamionët që hyjnë në Shtetet e Bashkuara. Tarifa do të rritet në 25%. […] Nëse ata prodhojnë makina dhe kamionë në fabrikat e SHBA-së, nuk do të ketë tarifë”, deklaroi Trump.

Ai shtoi gjithashtu se mbi 100 miliardë dollarë investime janë duke u realizuar në industrinë e automobilave në SHBA, duke e cilësuar këtë si një rekord historik.