Një ngjarje tragjike ka tronditur skenën muzikore në Brazil, ku këngëtari i njohur i muzikës pagode, Zau O Passaro, ka humbur jetën në një aksident të rëndë automobilistik vetëm pak orë pasi kishte mbajtur një koncert të suksesshëm me sallën plot.

27-vjeçari, emri i vërtetë i të cilit ishte Izac Bruno Coni Silva, po udhëtonte drejt shtëpisë në orët e para të mëngjesit të 3 majit, pasi kishte performuar në qytetin Barreiras. Sipas autoriteteve braziliane, automjeti me të cilin udhëtonte u përplas me një kamion të ndaluar në korsinë e një autostrade kryesore.

Nga përplasja e fortë, artisti mbeti i bllokuar mes rrënojave të makinës, ndërsa zjarrfikësit ndërhynë për ta nxjerrë. Ai u shpall i vdekur në vendngjarje.

Tre persona të tjerë që ndodheshin në automjet mbetën të plagosur dhe u transportuan me urgjencë në spital. Sipas raportimeve, një prej tyre ndodhet në gjendje kritike.

Zau O Passaro ishte një nga emrat në rritje në skenën e muzikës pagode në Brazil dhe numëronte rreth 260 mijë ndjekës në “Instagram”. Vetëm pak javë para tragjedisë, ai kishte firmosur një kontratë të re muzikore me Som Music.

Producenti i tij, Jadson Silva, tha se familja e artistit është në gjendje të rënduar emocionale.

“Për ne është shumë e vështirë, gruaja e Izac është shumë keq”, u shpreh ai.

Këngëtari la pas bashkëshorten dhe dy vajza të vogla. Trupi i tij u varros më 5 maj në qytetin e lindjes, Conceição do Almeida.