I ftuar në emisionin “Live From Tirana” me Ronaldo Sharka, gazetari dhe ish-banori i Big Brother VIP Albania, Shëndrit Lumi, ka folur për eksperiencën e tij në shtëpinë më të famshme në Shqipëri, planet për karrierën dhe dëshirën për t’u zhvilluar profesionalisht në televizionet shqiptare.

I pyetur nëse e sheh të ardhmen e tij në Top Channel dhe nëse do të zhvendosej në Tiranë, Shëndriti u shpreh se kryeqyteti shqiptar është një vend që e pëlqen shumë, ndërsa televizioni mbetet një nga pasionet e tij më të mëdha.

“Top Channel unë mendoj se është një prej ëndrrave të shumë gazetarëve, qoftë dhe nga Kosova, por dhe në Shqipëri sigurisht”, u shpreh ai.

Gazetari shtoi se dikur shumë profesionistë të medias kishin si synim Deutsche Welle, por sipas tij, dinamika e re e medias dhe mënyra e jetesës kanë ndryshuar ambiciet e brezit të ri.

“Unë mendoj se ëndrra më e madhe për të gjithë ata që duan ta zhvillojnë karrierën e gazetarisë, është Top Channel”, deklaroi Shëndrit Lumi.

Ai foli edhe për stilin e tij në gazetari, duke theksuar se karakterizohet nga ironia, sarkazma dhe aftësia për të nxjerrë lajmin.

“Unë jam pak sarkastik, kam ironi. Di të bëj pyetje, di edhe ta nxjerr lajmin. Mendoj që ky është profili im”, tha ai.

Shëndriti la të kuptohet se ka edhe ide konkrete për projekte televizive në të ardhmen, duke mos përjashtuar mundësinë e bashkëpunimeve të reja në ekranet shqiptare.