Një ngjarje e rëndë është regjistruar në Ferizaj, ku një foshnjë e porsalindur ka humbur jetën vetëm pak orë pas lindjes në ambientet e emergjencës.

Sipas informacioneve zyrtare, ngjarja ka ndodhur më 5 maj, ku një 20-vjeçare dyshohet se ka lindur foshnjën në tualetin e emergjencës së një institucioni shëndetësor. Foshnja është gjetur në gjendje shumë të rëndë shëndetësore.

Pavarësisht ndërhyrjes së menjëhershme të stafit mjekësor, foshnja nuk ka arritur të mbijetojë dhe ka ndërruar jetë pak më vonë.

Autoritetet kanë nisur hetimet dhe ndaj 20-vjeçares rëndon akuza për “vrasje të foshnjës gjatë lindjes”. Trupi i pajetë i foshnjës është dërguar në Institutin e Mjekësisë Ligjore për obduksion, me qëllim sqarimin e plotë të rrethanave të ngjarjes.

Hetimet vijojnë për zbardhjen e plotë të rastit.