Një ngjarje tragjike është regjistruar në New York City, ku një grua ka humbur jetën pasi ra në një pusetë mirëmbajtjeje të hapur në zonën e Fifth Avenue në Manhattan.

Sipas policisë amerikane, efektivët iu përgjigjën një telefonate emergjente pak para mesnatës së të hënës dhe gjetën gruan pa ndjenja në fund të pusetës, rreth tre metra të thellë. Ajo u transportua menjëherë në spital, por mjekët konfirmuan vdekjen e saj.

Viktima është identifikuar si Donika Gocaj, 56 vjeçe, me origjinë shqiptare dhe banuese në Briarcliff Manor, New York.

Një dëshmitar në vendngjarje ka deklaruar se ka dëgjuar të bërtitura nga pusetë, ndërsa viktima thuhet se ka thënë “po vdes”, para se të humbte ndjenjat.

Kompania energjetike Con Edison bëri të ditur se, sipas pamjeve të sigurisë, kapaku i pusetës dyshohet se ishte zhvendosur nga një automjet i rëndë pak minuta para incidentit.

Sipas kompanisë, raste të tilla janë të rralla, por kapakët e pusetave mund të lëvizen nga mjete të rënda, duke krijuar situata të rrezikshme në rrugë.

Familjarët e viktimës kanë shprehur tronditjen e tyre dhe po kërkojnë sqarime për rrethanat e plota të kësaj ngjarjeje tragjike që ndodhi në një nga zonat më të frekuentuara të qytetit.