Hetimet për zjarrin që përfshiu tregun e fruta-perimeve në Lushnjë kanë çuar në identifikimin e tre shtetasve si autorë të dyshuar të zjarrvënies, të cilët janë shpallur në kërkim nga policia.

Burime nga Policia e Shtetit bëjnë me dije se grupi hetimor po vijon punën për lokalizimin dhe kapjen e tyre, ndërsa hetimet janë përqendruar në analizën e kamerave të sigurisë në zonë.

Sipas të dhënave paraprake, tre personat janë afruar në pjesën e pasme të tregut dhe kanë hyrë në ambientet e brendshme pak para se të shpërthente zjarri. Pamjet e jashtme kanë regjistruar fillimisht tym dhe më pas përhapjen e flakëve, vetëm pak minuta pas hyrjes së tyre në zonë.

Megjithatë, për shkak të strukturës së tezgave dhe tendave të vendosura nga tregtarët, kamerat nuk kanë mundur të dokumentojnë momentin e saktë të zjarrvënies.

Zjarri ka shkatërruar pothuajse të gjithë strukturën e tregut dhe mallrat e të paktën 25 tregtarëve, ndërsa në total aty ushtrojnë aktivitet rreth 150 tregtarë.

Ndërkohë, Bashkia e Lushnjës po përgatit një projektvendim për kompensimin e dëmeve, i cili pritet të shqyrtohet në mbledhjen e ardhshme të Këshillit Bashkiak, ndërsa tregtarët kanë zhvendosur aktivitetin e tyre përkohësisht në zonat përreth tregut.