Aktori i njohur Keanu Reeves ka vendosur të mbështesë publikisht regjisorin Carl Rinsch, i cili është shpallur fajtor për përvetësimin e miliona dollarëve të destinuara për një projekt të Netflix.

Sipas mediave amerikane, Reeves i ka dërguar një letër gjykatës federale në New York, ku ka kërkuar që ndaj regjisorit të tregohet “mëshirë dhe mirëkuptim” gjatë shpalljes së dënimit.

Carl Rinsch, i njohur për bashkëpunimin me Reeves në filmin 47 Ronin, u shpall fajtor në fund të vitit 2025 për mashtrim financiar dhe pastrim parash.

Sipas hetimeve, ai kishte përdorur rreth 11 milionë dollarë të dhëna nga Netflix për prodhimin e serialit White Horse, por fondet dyshohet se u shpenzuan për luks personal dhe investime të rrezikshme.

Prokurorët pretendojnë se paratë janë përdorur për blerje makinash luksoze, orash të shtrenjta, mobiliesh, pagesa kartash krediti dhe investime në kriptovaluta, ku një pjesë e madhe e shumës u humb.

Në letrën e tij, Reeves shkruan se e njeh prej vitesh regjisorin dhe e konsideron një artist shumë të talentuar.

Megjithëse nuk justifikon veprimet e tij, aktori shprehet se beson që Rinsch është një person që shpesh dëmton vetveten për shkak të ambicieve të mëdha artistike.

Reeves zbuloi gjithashtu se kishte parë një version të papërfunduar të “White Horse”, të cilin e cilësoi si një projekt “kreativ dhe vizionar”.

Dënimi i regjisorit pritet të shpallet në fund të muajit qershor, ndërsa Netflix po kërkon rikthimin e miliona dollarëve të humbur nga projekti.