Shtetet e Bashkuara dhe Iran janë shumë pranë arritjes së një marrëveshjeje për zgjatjen e armëpushimit dhe nisjen e negociatave mbi programin bërthamor iranian, megjithëse disa pika kyçe mbeten ende të hapura.

Deklarata është bërë nga zëvendëspresidenti amerikan JD Vance, i cili në një intervistë për BBC tha se bisedimet po vazhdojnë intensivisht.

“Nuk jemi ende atje, por jemi shumë afër dhe do të vazhdojmë të punojmë për këtë”, deklaroi Vance para gazetarëve në Uashington.

Sipas tij, negociatat janë fokusuar kryesisht te çështja e pasurimit të uraniumit nga Irani dhe kufizimet që mund të vendosen ndaj programit bërthamor.

Raportimet ndërkombëtare bëjnë me dije se drafti i propozuar parashikon zgjatjen e armëpushimit për 60 ditë, duke krijuar kohë për negociata më të thelluara mes palëve.

Zyrtarë amerikanë i kanë thënë BBC-së se të dyja vendet kanë rënë dakord për një kuadër paraprak marrëveshjeje, në pritje të miratimit nga presidenti Donald Trump dhe udhëheqja iraniane.

Megjithatë, agjencia iraniane Tasnim raportoi se marrëveshja ende nuk është finalizuar.

Sipas kushteve të propozuara, SHBA kërkon që Irani të ndalojë prodhimin e uraniumit të pasuruar në nivele të larta dhe të eliminojë rezervat ekzistuese që mund të përdoren potencialisht për armë bërthamore.

Raportet mediatike sugjerojnë gjithashtu se drafti mund të përfshijë lejimin e kalimit të lirë nëpër Ngushtica e Hormuzit dhe heqjen graduale të minave detare nga Irani, ndërsa SHBA mund të lehtësojë disa sanksione për të mundësuar rifillimin e eksporteve iraniane të naftës.

Ndërkohë, Axios raportoi se Trump është informuar mbi propozimin, por ende nuk ka dhënë miratimin përfundimtar.

Media shtetërore iraniane publikoi gjithashtu elemente të një drafti jozyrtar me 14 pika, ku përfshihet tërheqja e forcave amerikane nga afërsia e Iranit dhe rikthimi i trafikut jo-ushtarak në Ngushticën e Hormuzit. Por Shtëpia e Bardhë e hodhi poshtë dokumentin, duke e cilësuar si “trillim të plotë”.