Presidenti i Shteteve të Bashkuara, Donald Trump, ka reaguar pas incidentit me të shtëna gjatë darkës së Shoqatës së Korrespondentëve, duke e lidhur ngjarjen me ndërtimin e një salle të re ballo në Shtëpinë e Bardhë.

Në një postim në platformën “Truth Social”, Trump ka deklaruar se ngjarja nuk do të kishte ndodhur nëse salla në ndërtim do të ishte përfunduar dhe do të ishte funksionale, duke theksuar se ajo do të ketë standarde të larta sigurie.

“Ky incident nuk do të kishte ndodhur nëse do të ekzistonte salla e ballove tepër sekrete, e nivelit ushtarak,” ka shkruar ai, duke shtuar se projekti është brenda buxhetit dhe përpara afateve.

Presidenti amerikan ka kritikuar gjithashtu padinë ndaj projektit, duke e cilësuar “qesharake” dhe të ngritur nga një person pa bazë ligjore për të paditur.

Ndërkohë, autoritetet amerikane po vijojnë hetimet për incidentin me armë zjarri që shkaktoi panik mes të pranishmëve në aktivitet.