Momente paniku janë regjistruar gjatë ditës së djeshme në Durrës, kur një autobus i linjës Durrës–Spitallë është përfshirë papritur nga flakët teksa ishte në lëvizje.

Ngjarja ka alarmuar pasagjerët dhe drejtuesin e mjetit, të cilët kanë arritur të largohen në kohë, ndërsa në vendngjarje kanë mbërritur menjëherë ekipet zjarrfikëse.

Falë ndërhyrjes së shpejtë të tyre, zjarri është vënë nën kontroll, duke shmangur përhapjen e flakëve dhe pasoja më të rënda.

Fatmirësisht, nga incidenti nuk raportohet për persona të lënduar.

Sipas informacioneve paraprake, dyshohet se shkak i zjarrit ka qenë një defekt elektrik në motorin e autobusit, ndërsa grupet hetimore po punojnë për të përcaktuar me saktësi rrethanat dhe shkaqet e ngjarjes.

Pamjet e autobusit të përfshirë nga flakët kanë qarkulluar edhe në rrjetet sociale, duke rikthyer vëmendjen te siguria teknike e mjeteve të transportit publik.