Një ngjarje e rëndë është regjistruar në zonën e Lungomares në Vlorë, ku një 28-vjeçare ka humbur jetën pasi ra nga kati i shtatë i një pallati.

Sipas informacioneve paraprake, rrethanat e ngjarjes mbeten ende të paqarta. Hetuesit po punojnë për të përcaktuar nëse bëhet fjalë për një vetëhedhje apo për një rënie aksidentale.

Burime nga vendngjarja bëjnë me dije se pemët poshtë pallatit kanë zbutur fillimisht goditjen, duke bërë të mundur që e reja të transportohej me shenja jete drejt spitalit. Megjithatë, pavarësisht përpjekjeve të stafit mjekësor, 28-vjeçarja nuk arriti t’u mbijetojë dëmtimeve të marra dhe ndërroi jetë.

Menjëherë pas ngjarjes, në vendngjarje mbërritën forcat e policisë dhe grupi hetimor, të cilët nisën veprimet për zbardhjen e plotë të rastit.

Deri më tani, autoritetet nuk kanë dhënë një version zyrtar mbi shkaqet që çuan në këtë ngjarje të rëndë, ndërsa hetimet vijojnë.