Autoritetet italiane kanë urdhëruar kryerjen e autopsisë për të zbardhur rrethanat e aksidentit tragjik ku humbën jetën shqiptari Xhevdet Bakushi, 42 vjeç, dhe italiani Agostino Lagnese, 69 vjeç.

Ngjarja e rëndë ndodhi më 19 korrik në rrugën shtetërore “Appia”, mes daljes së autostradës së Capuas dhe Pignataro Maggiore, në territorin e komunës Pastorano.

Zëvendësprokurorja Oriana Zona i ka ngarkuar ekspertizën mjekut ligjor Valerio Mastrioianni, i cili kreu ekzaminimin e trupave me qëllim përcaktimin e shkaqeve dhe kohës së vdekjes, si dhe dëmtimeve që kanë shkaktuar humbjen e jetës së dy viktimave. Në procedurë kanë marrë pjesë edhe familjarët e tyre.

Sipas mediave italiane, aksidenti ndodhi rreth orës 13:50, kur një mjet tip “Piaggio Porter” dhe një automjet “Fiat Stilo” u përplasën fuqishëm, duke përfunduar në mes të karrexhatës.

Nga përplasja, një prej personave që ndodhej në furgon, Xhevdet Bakushi, u përplas jashtë automjetit, ndërsa dy persona të tjerë mbetën të bllokuar brenda mjetit si pasojë e deformimit të rëndë të kabinës.

Në vendngjarje ndërhynë dy ekipe zjarrfikësish dhe disa ambulanca të urgjencës. Pavarësisht përpjekjeve të ekipeve të shpëtimit, për drejtuesit e dy mjeteve nuk pati mundësi ndërhyrjeje, pasi mjekët konstatuan vdekjen e tyre.

Hetimet për zbardhjen e plotë të dinamikës së aksidentit vijojnë nga karabinierët e stacionit të Pignataro Maggiore, nën drejtimin e Prokurorisë së Santa Maria Capua Vetere.