Kryetari i Listës Serbe, Zlatan Elek, ka reaguar lidhur me vendimin e Komisionit Qendror të Zgjedhjeve (KQZ) për të mos certifikuar partinë e tij për pjesëmarrje në zgjedhjet parlamentare të 9 shkurtit 2024. Ai ka akuzuar kryeministrin Albin Kurti për një përpjekje të organizuar për të penguar pjesëmarrjen e serbëve në zgjedhje dhe ka theksuar se vendimi është i paligjshëm dhe i motivuar politikisht.
“Besojmë se kjo është bërë me urdhër të Albin Kurtit për të penguar pjesëmarrjen e serbëve në zgjedhje. Ky vendim nuk ka bazë ligjore dhe është dëshmi se sa shumë dëshiron Kurti të eliminojë serbët nga këto anë. Kurti nuk dëshiron të shohë anëtarë të Listës Serbe në Kuvend, por dëshiron të shohë serbë të bindur si Nenad Rashiqi”, ka thënë Elek.
Ai ka paralajmëruar se do të dorëzojë një ankesë ndaj vendimit në panelin zgjedhor dhe ka kërkuar një vendim të qartë që ta refuzojë këtë veprim që e konsideron jodemokratik. “Gjatë ditës do të paraqesim ankesë dhe pres një vendim të qartë prej tyre për ta refuzuar këtë vendim jodemokratik të Kurtit”, ka shtuar ai.
Vendimi për moscertifikimin e Listës Serbe u mor gjatë mbledhjes së KQZ-së, ku shkak për këtë vendim u konsideruan thirrjet nacionaliste të kryetarit të partisë, Zllatan Elek, të bëra gjatë prezantimit të listës zgjedhore. Votimi në KQZ u zhvillua me dy vota pro, dy kundër, ndërsa anëtarët e tjerë refuzuan të marrin pjesë në votim. Anëtari i Lëvizjes Vetëvendosje, Sami Kurteshi, kishte kundërshtuar certifikimin, duke përdorur një audio-incizim ku Elek dëgjohej të bënte thirrje kundër Republikës së Kosovës.
