Personazhi i njohur i rrjeteve sociale Aleks Visha ka reaguar publikisht pas polemikave që shpërthyen pas ndalimit të tij nga autoritetet në Dubai dhe akuzave të ngritura lidhur me një fushatë bamirësie në platformën GoFundMe.

Pak ditë më parë, ai publikoi një video nga brenda një automjeti policie, ku konfirmoi se ishte shoqëruar nga autoritetet, duke ndezur më tej diskutimet në rrjet.

Çështja lidhet me një fushatë bamirësie në GoFundMe, ku u raportua se janë mbledhur rreth 450 mijë dollarë për trajtimin e një vajze me leukemia akute. Më pas, në rrjet nisën dyshime mbi vërtetësinë e rastit dhe mënyrën e menaxhimit të fondeve.

Në një video të gjatë në TikTok, Visha mohoi çdo akuzë për mashtrim apo përfitim personal, duke theksuar se ai nuk ka qenë organizatori i fondit.

“Atë GoFundMe unë e kam gjetur në vlerën e 180 mijë dollarëve. Kam bërë nder dhe kam përdorur besimin që publiku ka tek unë për ta çuar në 450 mijë dollarë,” deklaroi ai.

I revoltuar nga akuzat online, Visha sfidoi kritikët që të publikojnë prova konkrete ndaj tij.

“Zoti më vrastë nëse nuk hidhem nga ura e Stambollit nëse ju keni qoftë edhe një fakt të vetëm kundër meje,” u shpreh ai në video.

Sipas tij, e vërteta do të qartësohet pas publikimit të dokumenteve mjekësore dhe rezultateve të biopsisë së vajzës, për të cilën është ngritur edhe fushata.

Ai shtoi se do të ndërmarrë veprime ndaj çdo individi apo faqeje që, sipas tij, ka dëmtuar imazhin e tij me akuza të pabazuara.

Debati rreth kësaj çështjeje vijon të jetë një nga temat më të diskutuara në rrjetet sociale.