Trupi i pajetë i gjetur pranë termocentralit Enel në zonën Castel Giubileo të Romës është konfirmuar si ai i Suzanna Koçibellit, 62-vjeçares shqiptare, e cila ishte zhdukur që prej 10 janarit.
Zbulimi u bë më 15 janar, kur punonjësit e uzinës vunë re trupin në ujë dhe lajmëruan autoritetet. Karabinierët dhe mjekësia ligjore mbërritën menjëherë në vendngjarje, duke kryer kontrollet e para.
Sipas raportimeve, nuk janë gjetur shenja dhune, duke ngritur dyshime se bëhet fjalë për një vetëvrasje, pasi familjarët kishin shprehur shqetësimin se viktima vuante nga depresioni. Trupi ishte në ujë prej disa ditësh, dhe aktualisht ndodhet në morg, në pritje të vendimit të autoriteteve për autopsinë, e cila do të përcaktojë shkakun e saktë të vdekjes.
Familja e Suzanës kishte bërë denoncim për zhdukjen e saj, duke shpresuar deri në fund që ajo të kthehej në shtëpi. Vajza e saj, në një deklaratë për gazetën italiane Fanpage.it, kishte bërë një apel emocional:
“Për herë të fundit e pashë nënën time një natë para zhdukjes. Jetojmë në të njëjtën ndërtesë, por në apartamente të ndryshme. Mami, kthehu në shtëpi, jam e shqetësuar, të dua!”
Fatkeqësisht, pas dy javësh kërkimesh, familja e Suzanës mori lajmin më të rëndë të mundshëm. Autoritetet italiane vijojnë hetimet për të sqaruar rrethanat e plota të ngjarjes.
