Kryeministri Edi Rama ka zhvilluar një bashkëbisedim të drejtpërdrejtë me ndjekësit në rubrikën e njohur “Sy m’sy”, ku iu përgjigj pyetjeve dhe kritikave të publikut.

Në fjalën e tij, Rama foli për perceptimin negativ në media dhe akuzat ndaj tij dhe qeverisë:
“Jemi në kushtet kur ka dëshpërim të madh në anën tjetër, që reflektohet edhe në pasqyrat e kënetës mediatike. Flitet sikur jetojmë në një autokraci, por këtu nuk lihet gjë pa thënë për mua, për qeverinë, për PS-në – madje edhe për popullin që së fundmi konsiderohet i sëmurë,” – u shpreh ai.

Kryeministri theksoi se në të gjitha aspektet e jetës ka progres dhe se kërkesa për mandatin e katërt vjen pikërisht për të vazhduar këtë rrugë:
“Në të gjitha zonat dhe sektorët ka progres. Ka ende shumë për të bërë, prandaj kërkojmë mandatin e katërt.”

Ndër të tjera, Rama u ndal edhe te kritikat për gjuhën e tij:
“Flitet për gjuhën time, për fjalë që paskam thënë e që s’i ka thënë njeri tjetër. Cilat janë ato? Kam komunikuar hapur me publikun dhe kjo duket sikur u bën keq. Ka vetëm një gjë për të cilën kam kërkuar ndjesë – përdorimi i termit ‘autizëm politik’.”

Ai shpjegoi se termi përdoret në literaturën akademike, por tashmë është i konsideruar i papërshtatshëm dhe se nuk kishte qëllim fyese:
“E kam përdorur pa qëllim keqdashës, por duke ndjerë se mund të kem lënduar prindër të fëmijëve autikë, kërkova ndjesë. Kam bërë edhe ndonjë gabim tjetër më parë dhe kam kërkuar ndjesë. Ma gjeni një tjetër udhëheqës shqiptar që e ka bërë këtë.” – tha ai.