Tiranë – Drejtori i Përgjithshëm i Policisë së Shtetit, Drejtues Madhor Ilir Proda, ka përcjellë sot një mesazh falënderimi për të gjithë efektivët e Policisë së Shtetit dhe qytetarët shqiptarë, për rolin e tyre të pazëvendësueshëm gjatë zhvillimit të tre eventeve madhore në Tiranë, të cilat kishin një rëndësi të veçantë për imazhin e Shqipërisë në sytë e botës.

Në deklaratën e tij, Proda theksoi se punonjësit e policisë demonstruan profesionalizëm, përkushtim dhe përgjegjësi të lartë, duke garantuar sigurinë dhe mbarëvajtjen e aktiviteteve që përfshinë një numër të madh liderësh botërorë, personalitetesh ndërkombëtare dhe përfaqësuesish të lartë institucionalë.

“Dua të shpreh mirënjohjen time të thellë për çdo punonjës të Policisë së Shtetit, për sakrificën dhe gadishmërinë e treguar gjatë këtyre ditëve intensive. Po ashtu, falënderoj qytetarët e Tiranës dhe mbarë vendit, për mirëkuptimin dhe bashkëpunimin e treguar, duke kontribuar që Shqipëria të shfaqet dinjitoze në arenën ndërkombëtare,” u shpreh Proda.

Eventet, që përfshinë vizitën e Presidentit francez Emmanuel Macron, Samitin e Komunitetit Politik Evropian dhe Forumin për Inovacionin dhe Investimet e së Ardhmes, mobilizuan forcat e sigurisë në një nga operacionet më të mëdha logjistike dhe operacionale të viteve të fundit.

Drejtori i Policisë nënvizoi se kjo përvojë tregoi se institucionet shqiptare janë të gatshme të përballojnë sfida të mëdha dhe të jenë në lartësinë e pritshmërive ndërkombëtare.