Greqia po përballet me një valë të re zjarresh shkatërruese, këtë herë në ishullin turistik të Hios, ku prej tre ditësh flakët kanë përfshirë sipërfaqe të mëdha pyjore dhe toka bujqësore. Situata ka detyruar autoritetet të shpallin gjendjen e jashtëzakonshme, ndërsa përpjekjet për shuarjen e zjarreve po vazhdojnë pa ndërprerje.

Sipas autoriteteve greke, mbi 440 zjarrfikës, të ndihmuar nga 85 automjete dhe 13 mjete ajrore (helikopterë dhe avionë zjarrfikës), janë angazhuar në operacionin masiv për frenimin e flakëve që përparojnë me shpejtësi në disa vatra të ndryshme.

Pamje dramatike nga vendngjarja tregojnë qiellin e mbuluar nga tymi i zi, ndërsa forcat e emergjencës luftojnë me zjarrin që ka afruar fshatrat dhe zonat e banuara. Që prej të dielës, disa fshatra janë evakuuar, përfshirë edhe banorë të zonave pranë qytetit kryesor të ishullit.

Ministri i Mbrojtjes Civile dhe Krizës Klimatike, Giannis Kefalogiannis, deklaroi se autoritetet dyshojnë për zjarrvënie të qëllimshme, pasi zjarret kanë shpërthyer në vende të ndryshme dhe pa lidhje mes tyre. “Kushdo që luan me jetën e qytetarëve dhe shkakton kaos me veprime të qëllimshme, do të përballet me drejtësinë,” u shpreh ministri.

Për të përballuar situatën, qeveria ka shtuar forcat e policisë dhe patrullat ushtarake në ishull, ndërsa mbështetje është dërguar nga Athina, Selaniku dhe ishulli i Lesbos.

Flakët po rrezikojnë seriozisht plantacionet me pemët e mastikës, një produkt unik dhe i çmuar për ekonominë lokale të Hiosit. Zjarret kanë shpërthyer në një moment kritik, teksa sezoni turistik është në kulmin e tij, duke shtuar presionin mbi autoritetet dhe industrinë vendase të turizmit.

Ndërkohë, hetimet vazhdojnë, ndërsa komuniteti vendas dhe zjarrfikësit përballen me një betejë të ashpër për të ruajtur jetën, pronën dhe natyrën e rrallë të ishullit të Hiosit.