Presidenti rus Vladimir Putin e nisi konferencën e përbashkët me homologun amerikan Donald Trump, duke thyer protokollin e zakonshëm dhe duke marrë fjalën i pari. Në deklaratën e tij, Putin u përqendrua te konflikti në Ukrainë, duke e cilësuar si një “tragjedi mes dy popujve vëllezër” dhe duke nënvizuar se lufta nuk do të kishte shpërthyer nëse Trump do të ishte president në vitin 2022.
“Ne i konsiderojmë ukrainasit si një shtet vëlla. Ajo që ka ndodhur është një tragjedi, ndaj vendet tona janë të interesuara t’i japin fund kësaj situate. Duhet të eliminojmë shkaqet themelore të këtij konflikti. Siguria e Ukrainës duhet të garantohet, por edhe shqetësimet legjitime të Rusisë duhet të merren parasysh,” tha Putin.
Ai theksoi se për një paqe të qëndrueshme nevojiten standarde të reja afatgjata dhe shtoi se shpreson që Evropa dhe Ukraina të mos tentojnë të zhbëjnë progresin e arritur në bisedimet e zhvilluara në Alaska.
Putin gjithashtu e përshëndeti angazhimin e Trump në proces, duke e cilësuar atë si një lider të interesuar jo vetëm për prosperitetin e SHBA-së, por edhe për përmirësimin e marrëdhënieve mes dy vendeve. “Rusia dhe Amerika mund t’i ofrojnë njëra-tjetrës shumë mundësi, qoftë në fushën dixhitale, në kontaktet ndërkombëtare apo në sigurinë globale. Është koha të kthejmë faqe dhe të rivendosim paqen dhe bashkëpunimin,” shtoi presidenti rus.
Në përfundim, ai deklaroi me bindje se “nëse Trump do të ishte president në vitin 2022, nuk do të kishte luftë”, duke dërguar një mesazh të qartë mbi pritshmëritë e tij nga ky samit.
