Reshjet intensive të ditëve të fundit kanë shkaktuar dëmtime dhe bllokime rrugësh në qarkun e Gjirokastrës, ku disa zona vijojnë të jenë nën monitorim nga autoritetet lokale.

Prefektja e qarkut, Albana Hasanaj, deklaroi për ATSH se situata më problematike paraqitet në bashkinë Dropull, ku ura e fshatit Glinë është mbyllur për qarkullim për arsye sigurie. Ndërkohë, në bashkinë Tepelenë, Emergjencat Civile raportuan dëmtimin e një ure në fshatin Dhemblan, e cila përdoret nga banorët për të shkuar drejt tokave bujqësore. Bashkia po merr masa për të vënë urën provizorisht në funksion.

Në bashkinë Përmet, reshjet kanë qenë me intensitet të ulët dhe niveli i ujit në lumin Vjosa është 3.4 metra, me prurje 292.7 m³/s.

Në qytetin e Gjirokastrës, situata është e qetë, ndërsa në fshatin Zhulat është regjistruar një shkarje e vogël dheu. Një mjet i Bashkisë është nisur për pastrimin e aksit. Niveli i lumit është rikthyer në shtratin natyror, ndërsa vijon monitorimi i përrenjve malorë dhe zonave të rrezikuara në rrugët rurale.

Edhe në bashkinë Këlcyrë situata paraqitet e stabilizuar. Nuk ka pasur ndërprerje të energjisë elektrike apo furnizimit me ujë, dhe rrugët rurale raportohen të kalueshme.

Probleme paraqiten ende në bashkinë Libohovë, ku aksi Suhë–Poliçan mbetet i bllokuar. Bashkia Libohovë, në bashkëpunim me bashkinë Dropull, po ndërhyn në zonën e njohur si “Shkëmbi i Dallandyshes” për riparimin e shkërryerjes së trupit të rrugës. Përveç këtij segmenti, nuk raportohen problematika të tjera.

Autoritetet vijojnë monitorimin e situatës dhe pritet që ndërhyrjet të vazhdojnë deri në normalizimin e qarkullimit në të gjitha akset e prekura.