Një raportuese speciale e Kombeve të Bashkuara ka kërkuar heqjen e sanksioneve të SHBA-së ndaj Kubës, duke paralajmëruar se ato po ndikojnë në çdo aspekt të jetës në vend. Alena Douhan, raportuese për masat e njëanshme kufizuese, i cilësoi sanksionet si “regjimin më të gjatë të ndëshkimeve në historinë amerikane”.

Douhan theksoi se vetëm Kongresi amerikan mund të shfuqizojë embargon, e cila është vendosur që në fillimet e regjimit të Fidel Castros. Qeveria kubane, nga ana tjetër, vazhdon ta cilësojë këtë politikë si “ndëshkim kolektiv” ndaj popullit të saj dhe deklaron se nuk do të tërhiqet.

Sipas raportimit të Al Jazeera, Douhan nënvizoi se disa breza kubanësh janë rritur nën këto masa, duke formësuar realitetin ekonomik dhe social të vendit. Ajo shtoi se sanksionet janë ashpërsuar që prej vitit 2018 dhe kanë marrë një tjetër goditje në vitin 2021, me rivendosjen e Kubës në listën amerikane të “sponsorëve të terrorizmit”, gjë që ka kufizuar më tej aksesin financiar ndërkombëtar.

OKB-ja vëren se shumë vende dhe kompani i respektojnë automatikisht sanksionet amerikane për të shmangur penalizimet sekondare, çka e pengon Kubën të planifikojë afatgjatë dhe godet kohezionin social. Vendi po përballet me mungesa serioze ushqimesh, ilaçesh, energjie dhe uji, ndërsa emigracioni i profesionistëve po rritet ndjeshëm.

Sipas Douhan, pasojat kumulative të sanksioneve po cenojnë të drejtat themelore të qytetarëve, duke përfshirë të drejtën për jetë, ushqim dhe kujdes shëndetësor.

Ajo pritet të paraqesë një raport të detajuar mbi efektet e sanksioneve para Këshillit të OKB-së për të Drejtat e Njeriut në shtator 2026.