Kryetari i Partisë Demokratike, Sali Berisha, mbajti sot fjalën në Foltoren e radhës të demokratëve përpara Kryeministrisë, ku akuzoi ashpër qeverinë dhe kryeministrin Edi Rama, duke e cilësuar si “hajdutin më të madh të kombit”. Sipas tij, aferat korruptive të zv.kryeministres Belinda Balluku – tashmë e pandehur nga SPAK – kanë ekspozuar drejtpërdrejt edhe përgjegjësinë e kryeministrit.

Berisha e quajti sheshin ku zhvillohet protesta “Sheshi i Lirisë”, vendin ku, sipas tij, qytetarët po ngrihen për t’i dhënë fund “një bande të zhytur në krim dhe vjedhje të paimagjinueshme”.

“Ne kemi njohur pushtime, por kurrë nuk kemi shkuar 100 vite prapa brenda 10 viteve, siç ka ndodhur sot,” deklaroi Berisha, duke akuzuar qeverinë për varfërim të shpejtë, shpopullim dhe grabitje masive të pasurisë publike.

Ai u ndal tek skandali i Ballukut, të cilin e cilësoi “krizën më të paimagjinueshme në historinë e shtetit shqiptar”.

“Sipas dokumenteve zyrtare, janë vjedhur 50 milionë euro. Vetëm kjo mjaftoi që Edi Rama t’u deklaronte shqiptarëve se hajduti është vetë ai dhe se drejtësisë i tregon bërrylin,” u shpreh Berisha.

Kryedemokrati tha se në çdo vend demokratik, një kryeministër në një situatë të tillë “do të largohej menjëherë”, por sipas tij Rama po e mbron Ballukun sepse “paratë i kanë ndarë bashkë”.

“Në përçartjen e tij, Rama thotë se po mbron ministren, jo veten. Të dy jeni hajdutë,” deklaroi ai, duke theksuar se vendimi i GJKKO-së për pezullimin e Ballukut “fakton se kryehajduti i vërtetë është Rama”.

Berisha mbylli fjalën duke theksuar se protesta do të vazhdojë deri në fund, për t’i dhënë vendit, sipas tij, “një qeveri që respekton ligjin dhe qytetarët”.