Veriu i vendit është përfshirë sërish sot nga reshjet e dëborës, por situata nuk ka shkaktuar probleme në qarkullimin e mjeteve.

Kryeministri Edi Rama ndau në rrjetet sociale pamje nga puna që po bëhet për pastrimin e rrugëve dhe shpërndarjen e kripës, duke përfshirë zonat Bogë-Theth dhe Hani i Hotit-Dogana Vermosh.

“Rikthehen reshjet e dëborës në veri të vendit pa shkaktuar probleme me qarkullimin, ndërkohë që mjetet borëpastruese po punojnë për pastrimin e rrugëve dhe shpërndarjen e kripës,” shkroi Rama.

Ai gjithashtu u bëri apel drejtuesve të mjeteve për kujdes të shtuar gjatë drejtimit në zona malore, duke rekomanduar goma dimërore dhe zinxhirë.

Sipas Shërbimit Meteorologjik Ushtarak, Shqipëria po ndikohet nga kushte atmosferike të paqëndrueshme, ku në relievet e larta malore verilindje-lindje ka reshje dëbore me intensitet të ulët.