Prokuroria e Posaçme kundër Korrupsionit dhe Krimit të Organizuar (SPAK) ka vendosur sekuestrimin e disa pasurive të shtetasit Nikolla Hafësllari dhe personit të lidhur me të, Erjol Mekshi, në kuadër të hetimeve për çështjen pasurore nr. 9 të vitit 2025.

Hafësllari akuzohet për “Ushtrim të ndikimit të paligjshëm ndaj personave që ushtrojnë funksione publike”, vepër penale e kryer në bashkëpunim.

Pasuritë e sekuestruara
Sipas vendimit të Gjykatës së Apelit, janë sekuestruar:
• Dy garazhe në katin -1, në rrugën “Pjetër Bogdani”, Mëzez, Tiranë;
• Një automjet Audi A6, prodhim i vitit 2005;
• Një apartament 87.89 m² në të njëjtën adresë;
• Një apartament tjetër 61.89 m².

Vendimi i Apelit ndryshoi vendimin e Gjykatës së Posaçme të Shkallës së Parë dhe pranoi kërkesën e SPAK për sekuestrimin e pasurive të luajtshme dhe të paluajtshme.

Zbatimi i vendimit
Ekzekutimin e sekuestrimit do të bëjnë oficerët e Policisë Gjyqësore, në bashkëpunim me Agjencinë për Administrimin e Pasurive të Sekuestruara dhe të Konfiskuara (AAPSK). Administratorët e agjencisë do të kujdesen për menaxhimin dhe përdorimin e këtyre pasurive.

Hetimet ndaj Hafësllarit dhe Mekshit vijojnë për të dokumentuar lidhjet dhe shkeljet e dyshuara të ligjit.